18/04/2024
Ô Twardochu je zaś ôstatnio głośno ze poru powodōw. Jedyn ze powodōw z kerego sōm my radzi to prymiera jego nowego rōmana "Powiedzmy, że Piontek". Prymiera bydzie 05.06.2024, chociŏż we Ajncli napocznymy jōm sprzedŏwać dopiyro tydziyń niyskorzij. Pōjakymu tak? Bo drugi powōd czamu ô Twardochu zrobiyło sie głośno, a kerego już my radzi niy sōm, to jego atak na Łukasza Kohuta.
Wewnytrzny ajnlauf, ugrupowania z kerego Łukasz Kohut ze sukcesym sztartowoł we ôstatnim welōngu do Ojropyjskigo Parlamyntu, skludziył do tego iże trwŏ dyskusyjŏ fto powiniyn wysztartować ze "jedynki" na liście Lewicy. Wszyjsko traktowalibymy jako wewnyntrznõ sprawã tego ugrupowania (chociŏż i tak popiyralibymy Kohuta), eźli niy fakt że sztymã zabroł Szczepōn Twardoch. Napoczōn podwŏżać autorytet a dziołania Łukasza Kohuta, po to coby ftoś inkszy mioł tyn nojlepszy na plac na liście. We dytale włazić tukej niy bydymy, bo Ajncla ze założynia je apartyjnym geszeftym, napōmnymy ino iże Twardoch faworyzuje inksze skrzidło Lewicy, a nojwyraźni wadziyłoby sie to u niego ze poparciym dlŏ Kohuta.
Apelujymy tyż ze tego placu, iże akutalnie nojlepszym gwarantym ślōnskich spraw we Ojropyjskim Parlamyncie je Łukasz Kohut. Tymu tyż, na znak solidarności ś nim, ajnclowõ prymierã nojwoższego rōmana Twardocha przesuwōmy ô tydziyń, ôd tyj ôficjalnyj daty. Chociŏż, buchy mōmy już zabesztelowane, a bydymy je fizycznie mieć 5 czyrwnia, to bydōm tydziyń leżeć a czekać. Inksze buchy Szczepōna, tyż we tym ôkresie niy bydōm u nŏs dostympne do kupiyniŏ. Jeszcze jedna ciykawostka na fajrant - ôficjalnŏ prymiera je 05.06, zaś welōneg do Ojroparlamyntu 09.06
