https://www.facebook.com/106579640983157/

Mikeys, Santo Tomas (2024)

28/06/2023

Tutulungan ba Ako ng Diyos Kapag Nanalangin Ako?

Ang sagot ng Bibliya

Oo. Tinutulungan ng Diyos ang mga taimtim na humihiling sa kaniya ng mga bagay na ayon sa kaniyang kalooban. Kahit hindi mo pa nasubukang manalangin, mapapatibay ka ng mga halimbawa sa Bibliya ng mga taong nanalangin ng ‘Diyos ko, tulungan mo ako.’ Halimbawa:

“Tulungan mo ako, O Jehova na aking Diyos; iligtas mo ako ayon sa iyong maibiging-kabaitan.”—Awit 109:26.

“Ako’y dukha at nangangailangan! Magmadali, O Diyos, na ako’y tulungan!”—Salmo [o, Awit] 69:6, Biblia ng Sambayanang Pilipino.

Siyempre, ang sumulat ng mga ito ay may matibay na pananampalataya sa Diyos. Pero nakikinig din ang Diyos sa lahat ng taimtim na lumalapit sa kaniya, gaya ng mga “wasak ang puso” at “may espiritung nasisiil.”—Awit 34:18.

Huwag mong isiping napakalayo ng Diyos at wala siyang pakialam sa iyong mga problema. Sinasabi ng Bibliya: “Si Jehova ay mataas, gayunma’y nakikita niya ang mapagpakumbaba; ngunit ang matayog ay kilala lamang niya sa malayo.” (Awit 138:6) Sinabi pa ni Jesus sa kaniyang mga alagad: “Ang mismong mga buhok ng inyong ulo ay biláng na lahat.” (Mateo 10:30) Nakikita ng Diyos ang maliliit na detalye tungkol sa iyo na hindi mo man lang alam. Kaya di-hamak na mas magbibigay-pansin siya sa iyong mga kabalisahan kapag hiningi mo ang tulong niya sa panalangin.—1 Pedro 5:7.

27/06/2023

Sa mga salitang iyan, tiniyak ng Diyos na Jehova sa tapat na lingkod niyang si Josue na magagawa niyang ‘lakasan ang loob niya at magpakatatag’ kahit may matitinding pagsubok. Walang dahilan para matakot si Josue sa mga puwedeng mangyari kung susundin niya ang mga utos ng Diyos, dahil para bang nasa tabi niya si Jehova na tumutulong sa kaniyang magtagumpay. Masasabing kasama ni Josue ang Diyos kasi pinapatnubayan siya ng Diyos, at tinutulungan siyang talunin ang mga kaaway niya.

Paano magagawa ni Josue na ‘lakasan ang loob niya at magpakatatag’? Puwede siyang mapatibay ng mga kasulatan mula kay Jehova na mayroon na noong panahong iyon. Kasama na riyan ang “buong Kautusan na ibinigay [kay Josue] ng lingkod [ni Jehova na] si Moises.” (Josue 1:7) Sinabi ni Jehova kay Josue na ‘dapat niya itong basahin nang pabulong [“bulay-bulayin ito,” Ang Biblia—Bagong Salin sa Pilipino] araw at gabi.’ (Josue 1:8) Natulungan si Josue ng pagbabasa niya at pagbubulay-bulay ng Salita ng Diyos para gawin ang kalooban ni Jehova. Pagkatapos, kailangang isabuhay ni Josue ang natutuhan niya para “masunod [niyang] mabuti ang lahat ng nakasulat dito.” Kung gagawin niya iyan, makakagawa siya ng matatalinong desisyon at magtatagumpay siya. At iyon nga ang nangyari. Kahit na marami siyang hinarap na problema, naging masaya ang buhay ni Josue bilang isang tapat na mananamba ni Jehova.—Josue 23:14; 24:15.

Nakakapagpatibay pa rin sa ngayon ang mga sinabi ni Jehova kay Josue. Patunay iyan na nagmamalasakit si Jehova sa lahat ng mananamba niya, lalo na kapag may mga problema sila. Gaya ni Josue, gusto Niya na magtagumpay rin ang mga lingkod Niya. ‘Lalakas din ang loob nila at tatatag sila’ kung regular nilang babasahin at bubulay-bulayin ang Salita ng Diyos, ang Bibliya, at isasabuhay ang mga payo nito.

26/05/2023

Tip para makapagdesisyon ka nang tama

Huwag magpadalos-dalos sa pagdedesisyon. Sinasabi ng Bibliya: “Pinag-iisipan ng marunong ang bawat hakbang niya.” (Kawikaan 14:15) Kung magpapadalos-dalos ka sa pagdedesisyon, baka may malampasan kang importanteng detalye. Maglaan ng panahon para mapag-isipang mabuti ang bawat opsiyon.—1 Tesalonica 5:21.

24/05/2023

Ang talatang ito sa Kasulatan ang pinakasimpleng kahulugan ng pananampalataya. Ipinapakita nito na ang pananampalataya ay hindi lang basta paniniwala.

“Ang pananampalataya ay ang paghihintay sa mga bagay na may garantiya.” Sa orihinal na wikang Griego, ang salita sa Hebreo 11:1 na isinaling “pananampalataya” ay nagpapahiwatig ng kumpiyansa, pagtitiwala, o pagiging kumbinsido. Ang ganitong pananampalataya ay hindi lang basta nakabatay sa gusto nating mangyari; ito ay ang “paghihintay . . . na may garantiya.” Ang salitang Griego na isinaling “paghihintay . . . na may garantiya” ay puwede ring isaling “titulo,” na nagbibigay ng katiyakan, o pruweba, sa nagmamay-ari nito.

“Ang pananampalataya ay . . . ang malinaw na katibayan [o, “ang nakakukumbinsing ebidensiya,” talababa] na ang hindi nakikita ay totoo.” Ang pananampalataya ay resulta ng di-matututulang katibayan. Napakatibay nito kaya nakukumbinsi ang isang tao na totoo ang isang bagay kahit hindi niya ito nakikita.

31/01/2023

Daily Reminder

27/01/2023

Sinisigurado ng kawikaang ito na magtatagumpay ang lahat ng plano ng mga sumasamba sa tunay na Diyos kung magtitiwala sila sa kaniya, aalamin nila at susundin ang gabay niya.

“Ipagkatiwala mo kay Jehova ang anumang gagawin mo.” Bago gumawa ng mga desisyon, mapagpakumbabang humihingi ng gabay kay Jehova ang lahat ng mananamba niya. (Santiago 1:5) Bakit? Kasi kadalasan nang hindi kontrolado ng mga tao ang nangyayari sa buhay nila. (Eclesiastes 9:11; Santiago 4:13-15) At kung minsan, hindi rin nila alam kung ano ang pinakamagandang gawin. Kaya marami ang humihingi ng tulong sa Diyos. Nananalangin sila at kumikilos ayon sa kalooban niya na mababasa sa Bibliya.—Kawikaan 3:5, 6; 2 Timoteo 3:16, 17.

Ang pananalitang “ipagtiwala mo sa PANGINOON ang anumang iyong gagawin” ay literal na nangangahulugang “igulong sa PANGINOON ang lahat ng ginagawa mo.” Ganito ang paliwanag ng isang reperensiya tungkol sa pananalitang ito: Para itong “isang tao na inililipat ang dala-dala niya sa isang mas malakas sa kaniya.” Kaya makakatiyak ang lahat ng umaasa sa Diyos na tutulungan niya sila.—Awit 37:5; 55:22.

Ang pananalitang “anumang iyong gagawin” ay hindi nangangahulugan na sasang-ayunan o pagpapalain ng Diyos ang lahat ng gagawin ng isang tao. Para pagpalain ni Jehova, dapat na kaayon ito ng kalooban at pamantayan niya. (Awit 127:1; 1 Juan 5:14) Hindi pagpapalain ni Jehova ang mga sumusuway sa kaniya. Sa katunayan, “binibigo niya ang plano ng masasama.” (Awit 146:9) Pero kapag sinusunod ng mga tao ang pamantayan ni Jehova na nasa Bibliya, pagpapalain niya sila.—Awit 37:23.

“At magtatagumpay ka sa ‘yong mga layunin.” Isinalin ito ng ilan na “ang iyong mga panukala ay matatatag.” Sa Hebreong Kasulatan, o sa tinatawag ng karamihan na Lumang Tipan, ang salitang isinalin sa Tagalog na “matatatag” ay nagpapahiwatig ng ideya ng paglalatag ng pundasyon, at karaniwan nang tumutukoy ito sa pagiging matatag ng mga gawa ng Diyos. (Kawikaan 3:19; Jeremias 10:12) Kaya gagawin din ng Diyos na matatag ang mga plano ng lahat ng sumusunod sa kaniya, at tutulungan niya sila na magkaroon ng panatag, matatag, at masayang buhay.—Awit 20:4; Kawikaan 12:3.

28/12/2022

Kapag may kaunawaan ang isa, alam niya kung kailan ‘tatahimik’ at ‘magsasalita.’ (Ecles. 3:7) Sa ilang kultura, may kasabihan na “kung ang pagsasalita ay pilak, ginto naman ang pagtahimik.” Ibig sabihin, may panahon na mas mabuting manahimik kaysa sa magsalita. At iyan ang sinasabi sa Kawikaan 11:12: “Ang taong may malawak na kaunawaan ay nananatiling tahimik.”

30/11/2022

Makakatulong sa atin ang Bibliya.

TANUNGIN ANG SARILI: ‘Nagiging padalos-dalos ba ako kapag galít ako, kapag namimilí, o kapag pinanghihinaan ng loob? O pinag-iisipan ko muna ang magiging resulta ng gagawin ko?’

24/10/2022

Tinutulungan ni Jesus ang mga tagasunod niya na maunawaan na kapag napakatibay ng pag-ibig nila, handa silang mamatay para sa iba.

Bago nito, sinabi ni Jesus sa mga apostol niya: “Ito ang utos ko: Ibigin ninyo ang isa’t isa kung paanong inibig ko kayo.” (Juan 15:12) Anong klaseng pag-ibig ang mayroon si Jesus para sa kanila? Hindi ito makasarili, kundi mapagsakripisyong pag-ibig. Noong nangangaral si Jesus sa lupa, inuna niya ang pangangailangan at kapakanan ng mga tagasunod niya at ng iba kaysa sa sarili niya. Pinagaling niya ang mga may sakit at tinuruan sila tungkol sa Kaharian ng Diyos. Gumawa rin siya ng hamak na mga gawain para sa ikakabuti ng iba. (Mateo 9:35; Lucas 22:27; Juan 13:3-5) Pero nakakahigit ang pag-ibig na tinutukoy ni Jesus sa Juan 15:13. Sa katunayan, ilang oras lang pagkatapos niyang sabihin ang mga salitang ito, ipinakita niya ang nakakahigit na pag-ibig nang “ibigay [niya] ang buhay niya bilang pantubos na kapalit ng marami.” (Mateo 20:28; 22:39) Kaya sa kahanga-hangang paraan, naipakita niya na talagang mas mahal niya ang iba kaysa sa sarili niya.

Mahal ni Jesus ang lahat ng tao. Pero mas mahal ni Jesus ang mga sumusunod sa mga turo niya. Itinuring ni Jesus ang mga tagasunod niya bilang malalapít na kaibigan niya dahil sumusunod sila sa mga tagubilin niya, at hindi nila siya iniwan sa panahon ng mga pagsubok. (Lucas 22:28; Juan 15:14, 15) At dahil dito, mas may dahilan siya para ibigay ang buhay niya para sa kanila.

Isinapuso ng mga Kristiyano noon ang mga salita ni Jesus kaya handa silang mamatay para sa isa’t isa. (1 Juan 3:16) Oo, di-makasariling pag-ibig ang ipinakita ni Jesus, at dito makikilala ang mga tunay na Kristiyano.—Juan 13:34, 35.

18/10/2022

Makakatulong Ba Talaga sa Akin ang Sinasabi ng Bibliya?

Oo. Kapag nai-stress, matutulungan tayo ng Diyos na maging kalmado kung aasa tayo sa kaniya.

Awit 94:19: “Noong maraming gumugulo sa isip ko, pinayapa mo ang kalooban ko at pinaginhawa mo ako.”

30/08/2022

Ang sabi ng Bibliya: “Poprotektahan ko siya dahil alam niya ang pangalan ko. Tatawag siya sa akin, at sasagutin ko siya.”—Awit 91:14, 15.

Ibig sabihin: Nagbibigay-pansin ang Diyos, na ang pangalan ay Jehova, sa mga taong alam ang pangalan niya at ginagamit ito nang may paggalang. (Awit 83:18; Malakias 3:16) Ipinakilala ng Diyos ang sarili niya sa atin nang sabihin niya ang pangalan niya. “Ako si Jehova. Iyan ang pangalan ko.”—Isaias 42:8.

Ang puwede mong gawin: Gamitin mo ang pangalan ni Jehova.

29/07/2022

Nangako ang Diyos na Jehova na bibigyan niya ng kapayapaan at magandang kinabukasan ang kaniyang mga mananamba. Sinabi ito ng Diyos sa mga Israelita noon, pero iyan pa rin ang gusto niya para sa mga tao ngayon. Siya ang ‘Diyos na nagbibigay ng pag-asa.’ (Roma 15:13) Ang totoo, tiniyak ng Diyos na mababasa ito sa Bibliya para magkaroon tayo ng pag-asa.—Roma 15:4.

19/06/2022

Makakatulong Ba Talaga sa Akin ang Sinasabi ng Bibliya?

Ang sagot ng Bibliya

Oo. "Ang lahat ng bagay na isinulat noon ay isinulat para matuto tayo, at may pag-asa tayo dahil ang Kasulatan ay nagbibigay sa atin ng lakas at tumutulong sa atin na magtiis." - Roma 15:4

30/05/2022

Saan nagmula ang kasamaan?

Karaniwan na, gusto ng mga tao na maging mapagpayapa, tapat, at mabait. Pero bakit madalas nating makita ang karahasan, kawalang-katarungan, at kalupitan? Palasak ang nakasisindak na mga balita. May nag-uudyok ba sa mga tao na gumawa ng masama?—Basahin ang 1 Juan 5:19.

Ginawa ba ng Diyos ang tao na may tendensiyang gumawa ng masama? Hindi. Nilalang ng Diyos na Jehova ang tao ayon sa kaniyang larawan, na may tendensiyang tularan ang pag-ibig ng Diyos. (Genesis 1:27; Job 34:10) Pero binigyan din ng Diyos ang tao ng kalayaang pumili. Nang piliin ng ating unang mga magulang na gumawa ng masama, hindi nila tinularan ang halimbawa ng Diyos kaya hindi na sila naging perpekto. Namana natin sa kanila ang tendensiyang magkasala.—Basahin ang Deuteronomio 32:4, 5.

Hindi na ba mawawala ang kasamaan?
Gusto ng Diyos na labanan natin ang ating masasamang hilig. (Kawikaan 27:11) Kaya tinuturuan niya tayo kung paano iiwasan ang paggawa ng mali at kung paano masusumpungan ang tunay na kaligayahan. Pero sa ngayon, hindi natin lubusang matutularan ang pag-ibig ng Diyos.—Basahin ang Awit 32:8.

Bagaman maraming kasamaan ngayon, pinahihintulutan ito ng Diyos sa loob ng limitadong panahon para makita natin ang masasaklap na resulta nito. (2 Pedro 3:7-9) Pero hindi na magtatagal, ang lupa ay mapupuno ng maliligayang tao na sumusunod sa Diyos.—Basahin ang Awit 37:9-11.

30/05/2022

Galing ba sa Diyos ang ating pagdurusa?

“Ang totoo, ang Diyos ay hindi gumagawi nang may kabalakyutan.”—Job 34:12.

ANG SINASABI NG MGA TAO
Sinasabi ng ilan na ang lahat ng nangyayari ay kalooban ng Diyos. Kaya naman naniniwala sila na galing sa Diyos ang pagdurusa natin. Halimbawa, kapag may nangyayaring likas na mga sakuna, iniisip nila na paraan ito ng Diyos para parusahan ang mga nagkasala.

ANG SABI NG BIBLIYA
Malinaw na itinuturo ng Bibliya na hindi galing sa Diyos ang ating pagdurusa. Halimbawa, sinasabi ng Bibliya na kapag may mga problema tayo, hindi tamang sabihin: “Ako ay sinusubok ng Diyos.” Bakit? Dahil “sa masasamang bagay ay hindi masusubok ang Diyos ni sinusubok man niya ang sinuman.” (Santiago 1:13) Ibig sabihin, hindi galing sa Diyos ang mga problema natin ni ang mga pagdurusang dulot nito. Kung gagawin niya iyon, lalabas na napakasama niya, pero “ang Diyos ay hindi gumagawi nang may kabalakyutan.”—Job 34:12.

Kung hindi galing sa Diyos ang pagdurusa, kanino o saan ito galing? Nakalulungkot, ang mga tao ay madalas na maging biktima ng kanilang kapuwa di-sakdal na tao. (Eclesiastes 8:9) Bukod diyan, maaari tayong mapahamak dahil sa mga “di-inaasahang pangyayari”—baka nasa maling lugar tayo sa maling panahon. (Eclesiastes 9:11) Itinuturo ng Bibliya na “ang tagapamahala ng sanlibutang ito,” si Satanas na Diyablo, ang talagang pinagmumulan ng pagdurusa ng tao, dahil “ang buong sanlibutan ay nasa kapangyarihan ng isa na balakyot.” (Juan 12:31; 1 Juan 5:19) Kaya si Satanas—hindi ang Diyos—ang dahilan ng pagdurusa ng tao.

29/04/2022

Makakatulong ba ang payo ng Bibliya para sa'yo?

MAGING MASIPAG SA TRABAHO
Ang sabi ng Bibliya: “May pakinabang sa bawat pagsisikap.”—Kawikaan 14:23.

Maging positibo sa trabaho mo. Kahit hindi mo gusto ang trabaho mo, ang mahalaga, kumikita ka pa rin.

Maging masipag at maaasahan. Makakatulong ito para hindi ka mawalan ng trabaho. At kung sakali mang mawalan ka ng trabaho, mas madali kang makakahanap.

Gusto mo bang matuto ng higit pa?

26/04/2022

Makakatulong ba ang mga payo ng Bibliya para sa'yo?

“Ang masayang puso ay nakabubuti bilang pampagaling.”—KAWIKAAN 17:22.

Ang simple pero makatotohanang mga pananalitang iyan ay binigkas ni Haring Solomon ng Israel mga 3,000 taon na ang nakararaan. Pero totoo ba ang mga iyan? Ano ang ipinakikita ng makabagong medisina?

Ang pagiging masayahin ay may magandang epekto. Sinabi ni Dr. Derek Cox, isang opisyal sa kalusugan sa Scotland, sa isang ulat ng BBC News: “Kung masayahin ka, mas maliit ang tsansa na magkasakit ka kumpara sa mga taong malungkutin.” Sinabi pa sa ulat: “Ang mga taong masaya ay mas nakaiiwas din sa mga karamdamang gaya ng sakit sa puso at istrok.”

Bakit alam na noon ni Solomon—at ng iba pang manunulat ng Bibliya—ang mga bagay na ngayon lang natutuklasan ng siyensiya? Simple lang ang sagot. “Ang Diyos ay patuloy na nagbigay kay Solomon ng napakalaking karunungan at unawa.” (1 Hari 4:29) Ang karunungang iyan ay isinulat sa simpleng pananalita para makinabang ang lahat. At wala itong bayad!

Gusto mo bang matuto ng higit pa mula sa Bibliya?

28/03/2022

Iniimbitahan ka namin!

28/03/2022

Makakatulong Ba Talaga sa Akin ang Sinasabi ng Bibliya?

Oo. Tingnan ang sinasabi ng Bibliya tungkol sa kalungkutan.

Awit 31:7: “Nakita mo ang pagdurusa ko; alam mo ang paghihirap ng kalooban ko.”

Ibig sabihin: Nakikita ng Diyos ang lahat ng pinagdadaanan mo. Naiintindihan niya ang nararamdaman mo—kahit hindi iyon naiintindihan ng iba.

27/02/2022

Paano tayo tinutulungan ng Bibliya na maging positibo?

Sinasabi sa atin ng Bibliya kung ano ang puwede nating gawin para gumanda ang buhay natin. Dahil dito, nagiging positibo tayo. Tingnan ang ilang halimbawa.

Magpagabay sa Bibliya. Sinasabi ng Awit 119:105: “Ang salita mo ay lampara sa aking paa, at liwanag sa aking landas.” Dalawang bagay ang maitutulong ng maliwanag na ilaw. Kaya nitong ilawan ang mismong nasa harapan natin at matutulungan tayo nitong makita ang mga bagay na nasa malayo. Ganiyan din ang Bibliya. Mayroon itong mga prinsipyo na makakatulong sa mga problemang kinakaharap natin sa ngayon, kaya naman nagiging positibo tayo sa araw-araw. Naibabalik ng mga turo ng Bibliya ang ating lakas at “nagpapasaya [ito] ng puso” natin. (Awit 19:7,8 ) Kasabay niyan, ipinapakita ng Bibliya ang napakagandang layunin ng Diyos sa hinaharap para sa mga tao at sa lupa. Dahil sa pag-asang iyan, nagiging masaya tayo at kontento.

30/01/2022

Praktikal na mga Payo ng Bibliya Para Makayanan ang Pag-aalala.

“Kung paanong ang bakal ay napatatalas ng bakal, napatatalas din ng isang tao ang kaibigan niya.”—Kawikaan 27:17.

Ibig sabihin: Matutulungan tayo ng iba na makayanan ang mga álalahanín—kung magpapatulong tayo. Baka mapayuhan nila tayo base sa mga naranasan nila. At baka nga may ibang anggulo silang nakikita na hindi natin naiisip.

Subukan ito: Isipin kung sino ang puwedeng makapagbigay sa iyo ng magandang payo, gaya ng isang kaibigan na nakaranas na rin ng pinagdaraanan mo. Tanungin siya kung ano ang nakatulong at hindi nakatulong sa kaniya.

26/01/2022

Anong pag-asa ang ibinibigay ng Bibliya?

Sinasabi ng Bibliya kung bakit marami tayong problema. At sinasabi rin nito na pansamantala lang ang mga problema at malapit na itong mawala. Ang mga pangako sa Bibliya ay magbibigay sa iyo ng “magandang kinabukasan at pag-asa.” (Basahin ang Jeremias 29:11, 12.) Matutulungan ka ng mga pangakong iyon na makayanan ang mga problema, maging positibo sa buhay, at maging tunay na masaya.

30/12/2021

Mga prinsipyo sa Bibliya para makayanan ang mga pagbabago pagkatapos ng pandemic

Maging positibo

Teksto: “Huwag mong sabihin, ‘Bakit ba mas maganda ang mga araw noon kaysa ngayon?’ dahil hindi katalinuhang itanong ito.”—Eclesiastes 7:10.

Ang puwede mong gawin: Sikapin mong maging masaya anuman ang kasalukuyang sitwasyon mo. Huwag balik-balikan o isipin na mas maganda ang buhay bago ang pandemic. Huwag ding isip-isipin ang mga bagay na hindi mo nagawa dahil sa mga restriksiyon ng pandemic.

28/12/2021

Magiging maganda ang kaugnayan natin sa iba kapag nakapokus tayo sa maibibigay natin, hindi sa makukuha natin. Kung makasarili ka, masisira ang kaugnayan mo sa iba. Halimbawa, kung makasarili ang isa, puwede siyang magtaksil sa asawa niya. Wala ring gustong makipagkaibigan sa tao na bukambibig ang mga pag-aari niya at mga nalalaman niya. Kaya gaya ng sinasabi ng aklat na The Road to Character, “walang magandang patutunguhan ang pagiging makasarili.”

07/11/2021

Para makaligtas at mabuhay magpakailanman, kailangan nating “makilala” ang Diyos. Para magawa iyan, hindi sapat na basta naniniwala tayong may Diyos o may alam lang tayong ilang bagay tungkol sa kaniya. Kailangan nating makipagkaibigan sa kaniya. Walang pinagkaiba iyan sa pakikipagkaibigan sa isang tao. Kung gusto nating mapalapít sa taong iyon, kailangan nating maglaan ng panahon sa kaniya. Ganiyan din ang pakikipagkaibigan sa Diyos.

24/10/2021

KAYAMANAN—PUWEDENG MAWALA SA ISANG IGLAP

“Huwag kang magpakapagod para mag-ipon ng kayamanan. Tumigil ka at magpakita ng unawa. Kapag tiningnan mo iyon, wala na iyon doon, dahil tiyak na tutubuan iyon ng mga pakpak na gaya ng sa agila at lilipad sa langit.”—KAWIKAAN 23:4, 5.

Pansamantala lang ang kapanatagang ibinibigay ng pera. Puwedeng maubos ang ipon mo sa isang iglap kasi walang kasiguruhan ang trabaho at negosyo sa mundong ito. Dahil sa sakuna, gaya ng lindol, sunog, at bagyo, puwedeng maglaho na parang bula ang lahat ng pera at ari-arian ng isang tao.

26/09/2021

Kapag namahala na ang gobyerno ng Diyos sa buong mundo, magiging napakasaya ng buhay sa lupa. Magkakaisa rin ang mga tao at magkakaroon ang bawat isa ng makabuluhang trabaho. Inatasan ng Diyos si Jesu-Kristo para mamahala sa buong lupa. Di-gaya ng maraming lider sa ngayon, talagang nagmamalasakit si Jesus sa mga sakop niya. Mamamahala siya nang may pag-ibig, at magiging mabait siya, maawain, at patas na Hari.—Isaias 11:4.

29/08/2021

Ang sabi ng Bibliya: “Isang henerasyon ang lumilipas, at isang henerasyon ang dumarating, pero ang lupa ay mananatili magpakailanman.”—ECLESIASTES 1:4.

ANG IBIG SABIHIN: Ayon sa Bibliya, ang lupa ay hindi kailanman wawasakin at lagi itong titirhan. Kaya ano ang mangyayari kapag nagwakas ang mundo?

PAG-ISIPAN: Inihalintulad ng Bibliya ang darating na wakas ng mundong ito sa nangyari noong panahon ni Noe. Noong panahong iyon, ang lupa ay “punô ng karahasan.” (Genesis 6:13) Pero masunurin si Noe sa Diyos. Kaya nang puksain ng Diyos ang masasama sa pamamagitan ng baha, iniligtas niya si Noe at ang pamilya nito. Tungkol sa pangyayaring iyan, sinasabi ng Bibliya: “Ang sanlibutan [o mundo] nang panahong iyon ay napuksa dahil sa baha.” (2 Pedro 3:6) Iyan ang katapusan ng mundong iyon. Pero ano nga ba ang nagwakas? Hindi ang lupa, kundi ang masasamang tao na nasa lupa. Kaya kapag binabanggit ng Bibliya ang wakas ng mundo, hindi ito tumutukoy sa paggunaw ng planetang Lupa. Sa halip, tumutukoy ito sa wakas ng masasamang tao sa lupa at ng sistemang ginawa nila.