20/11/2024
Sa kabutihan ng ating relihiyon, ang Islam, kapag nakikita natin ang mga pagkakamali o suliranin sa ating paligid, hindi sapat na magbigay lamang tayo ng kritisismo o komento. Ang tunay na esensiya ng Islam ay ang magbigay ng payo na may layuning magturo at magdala ng solusyon.
Ang mabuting Muslim, kapag nagbibigay ng payo, ay hindi lamang tumutukoy sa problema, kundi nagmumungkahi rin ng makabuluhang solusyon batay sa aral ng Islam. Dapat nating ipakita ang kagandahan ng ating relihiyon sa pamamagitan ng pagbibigay ng mga makatuwiran, makatarungan, at positibong mungkahi na nakakatulong sa paglutas ng mga hamon sa ating lipunan.
Halimbawa, sa halip na husgahan ang isang tao sa kanyang kamalian, magbigay tayo ng payo na nagpapakita ng habag at malasakit, kasabay ng paghimok sa kanya na magbago para sa ikabubuti niya at ng kanyang kapaligiran. Ang layunin ng payo ay hindi para manisi kundi upang magtulungan at mag-ambag sa mas maging maayos na pamayanan.
Tandaan, sa Islam, ang pagpapayo ay isang anyo ng dakilang gawaing ibadah. Ginagawa ito nang may sinseridad, kababaang-loob, at pag-asa na ang tatanggap nito ay mapapalapit kay Allah.
“At magtulungan kayo sa kabutihan at takot kay Allah, at huwag kayong magtulungan sa kasalanan at poot.”
(Surah Al-Ma’idah, 5:2)
