07/06/2022
ဆာကေး (Sake) ဆိုတာဘာလဲ။
ဆာကေးဆိုတာကတော့ အားလုံးသိကြတဲ့အတိုင်း
ဂျပန်ရိုးရာ ဆန်အရက်ပါ။
ဒီအရက်ကို ချက်လုပ်ရာမှာ အဓိကမရှိမဖြစ်ကတော့
ရေ သန့်သန့်ကောင်းကောင်း ပါပဲ။
အဲ့ဒီ့နောက်မှာတော့ ဆန်၊ ကိုဂျီမှို (မီဆိုဟင်းချိုထဲထည့်တဲ့
ရေညှိနဲ့တူတူပါပဲ) နဲ့ ကစော်ဖောက်ဖို့တဆေး တို့လိုအပ်ပါတယ်။
ကစော်ဖောက်ပြီးသွားရင်တော့ အပေါ်ရည်ကြည်ကိုပဲယူပြီးရင်တော့ အောင်မြင်တဲ့ဆာကေးကို ရပြီပဲဖြစ်ပါတယ်။
ဆာကေးမှာ အယ်လ်ကိုဟော ၁၅ ရာခိုင်နှုန်းပါဝင်ပြီး
အမြင့်ဆုံးကတော့ ၁၇ ရာခိုင်နှုန်းထိပါဝင်တတ်ပါတယ်။
ဘာလို့ဂျပန်လူမျိုးတွေကဆာကေးကိုသောက်ကြတာလဲ?
ဂျပန်လူမျိုးတွေဟာ ဆန်နဲ့အရက်ချက်တာကို ဘယ်အချိန်မှာစတင်ခဲ့လည်းဆိုတာ ခုထိ မရှင်းလင်းသေးပေမဲ့ ဆန်ကို စတင်ပြီးတွင်တွင်ကျယ်ကျယ် စိုက်ပျိုးခဲ့တဲ့ လွန်ခဲ့သောနှစ်ပေါင်း ၂၀၀၀ နီးပါးလောက်ကတည်းက ဆန်အရက်ပေါ်ပေါက်လာခဲ့တာ ဖြစ်နိုင်ပါတယ်။
ဂျပန်လူမျိုးတွေဟာ ဆန်ကိုစားသုံးတာနဲ့အသားကျလာပြီးနောက်မှာတော့ ဆန်နဲ့ပြုလုပ်ထားတဲ့သောက်စရာကိုပါ ပြုလုပ်လာကြပါတယ်။
ဆန်နဲ့ပြုလုပ်ထားတဲ့ ဆာကေးဟာလည်း ဂျပန်ရိုးရာ ဆန်မုန့်တွေ ဟင်းပွဲတွေနဲ့ အလွန်လိုက်ဖက်ပါတယ်။
ဆာကေးကိုဟင်းချက်ရာမှာသုံးနိုင်ပါသလား။
ဟင်းချက်ဝိုင်တွေလိုပဲ ဆာကေးကိုလည်း ဟင်းချက်ရာမှာ
အသုံးပြု့လေ့ရှိပြီး ဟင်းချက်ဖို့အတွက်သီးသန့် စျေးပေါတဲ့ ဆာကေးတွေကိုလည်း ဂျပန် စူပါမားကတ်တွေမှာ ဝယ်ယူရရှိနိုင်ပါတယ်။ ဟင်းလျာတိုင်းနီးပါးမှာထည့်သွင်းအသုံးပြုနိုင်ပြီး ဆာကေးကိုထည့်သွင်းချက်ပြုတ်ထားပါက ၎င်းဟင်းလျာရဲ့အရသာကို ပိုမိုပြင်းသွားစေပါတယ်။
ဆာကေးဟာ ကျန်းမာရေးကို အကျိုးပြုပါသလား။
ဆာကေးဟာ ကျန်းမာရေးရှုထောင့်အရ ကောင်းတဲ့အချက်တွေရှိပါတယ်။
သူက ကင်ဆာဖြစ်နိုင်ချေကိုလျော့နည်းစေပြီး ဆီးချိုနဲ့ သွေးတိုးရောဂါသမားများအတွက်ပါ ကောင်းကျိုးတွေရစေပါတယ်။ နောက်တစ်ချက်ကတော့ ဆာကေးဟာ မယ်လနင်ဓာတ်ထွက်ခြင်းကိုလျှော့ချပေးတာကြောင့် အမဲစက်နဲ့ နေလောင်ဒဏ်တွေကို သက်သာစေပြီးအသားအရေကိုကြည်လင်စေပါတယ်။ ဒါကြောင့် ဂျပန်မှာရှိတဲ့ အချို့သော Skin Care Company တွေဟာ ဆာကေးကို ၎င်းတို့ကုန်ပစ္စည်းတွေမှာ ထည့်သွင်းအသုံးပြုကြပါတယ်။
ဆာကေးကိုဘယ်လို သောက်သင့်လဲ?
ဆာကေးစသောက်တော့မယ်ဆိုရင် ဂျပန်ရိုးရာအတိုင်း ဆာကေး set ကိုပြင်ဆင်ရပါမယ်။ ဆာကေး set ထဲမှာ ဘာတွေပါလဲဆိုတော့
ဆာကေးထည့်တဲ့ အိုး (tokkuri) နဲ့ ဆာကေးသောက်တဲ့ခွက်
အသေးလေး (ochoko) တို့ပါဝင်ပါတယ်။
ဆာကေးရဲ့ အရသာဟာ အပူချိန်ကိုလိုက်ပြီးပြောင်းလဲတတ်တာမို့ ခွက်တစ်ဝက်လောက်ပဲထည့်သောက်တာဟာ လုံလောက်တဲ့ပမာဏနဲ့ အရသာခံဖို့အသင့်တော်ဆုံးပဲဖြစ်ပါတယ်။
ဆာကေး ကိုအပူနဲ့ အအေး ၂ မျိုးလုံးနဲ့သောက်သုံးနိုင်ပြီး အပူသောက်သုံးလိုပါက ဆာကေးအိုးအား ရေနွေးထဲ စိမ်၍သောက်သုံးနိုင်ပြီး အအေးသောက်လိုပါက ဆာကေးအိုးနဲ့ ဆာကေးခွက်ကို ရေခဲသေတ္တာထဲမှာ
ထည့်ထားပြီး သောက်သုံးနိုင်ပါတယ်။ တစ်မျိုးစီမှာ အပူချိန်ကိုလိုက်ပြီး အနံ့ ၊ အရသာ ပြောင်းလဲသွားတာမို့ ဘယ်တစ်မျိုးကို ကြိုက်နှစ်သက်လည်းဆိုတာ အတွေ့အကြုံတွေမျှဝေသွားပါဦး။
