VIDE, VIDE! Espazo enocultural Tenda especializada en Santiago de Compostela adicada á divulgación da cultura dos viños galegos.
31/01/2025
Terra de Asorei Cepas Centenarias 2023
Por fortuna onte puidemos atender moi agradecidos o amabilísimo convite de Roque Durán para a presentación en primicia do seu novo viño de cepas centenarias. Será agora presentado en Barcelona e en Alemania, e non sairá ao mercado ata outubro deste ano.
O albariño procede da finca do Ouso da Torre, viñas rexistradas en 1902, mais con referencias documentais nos séculos XIX, no XVI e chegando mesmo ao século XII como propiedade de San Martiño Pinario.
A viña foi traballada contemporaneamente por Germán Pintos, o seu fillo Ramón e o seu neto Tino Pintos, hoxe integrante da adega Terra de Asorei. Unha adega familiar con vocación de facer bos viños de orixe Salnés para a xente de aquí e para todo o mundo.
Compartimos a paixón e a súa visión do viño como parte integrante da cultura e identidade galegas. E encantounos probar un viño especial elaborado a partir de 140 cepas centenarias da finca, cun proxecto pioneiro de trazabilidade dixital cepa a cepa para demostralo.
Moitas grazas polo recibimento e moitísima sorte co novo proxecto.
