03/02/2023
Martial Law icih in bang ahi hiam?
SAC in Martial law Zogam khua 7 te ah tangko na hangin mipi akua mapeuh kipatau hi. tua ahih leh martial law icih bangdan, koi cidan ahi hiam cih theihnop huai hi.
Martial law icih in
Martial law icih pen mipi thu vaihawmna (civil government) ki hemkhia in galkap thuneihna tawh vai kihawm theihna thukhun ahi hi. adiak in ukna buluh hun leh gam patauh lauhuai hunte ah kizang hi.
Patauh lauhuaina (crisis), vai kin (emergency) te leh luahsa munkuam sungah thuneihna/ukna letkip zawh nading cihte ah ki tangko ahi hi.
Democracy gam diktak te ah khuahun siat laitak in thukin tangkona (emergency) kilim zat zaw hi. gam thukin tangkona hileh mipi thuneihna om lai veve a, mipi suahtakna a ngei sang kigak zaw deuh cih ciang ahihi.
Martial law tangkona hangin mipi te suahtaknate ahi – ut hun in sungtum pusuah theihna,
- suakta takin paukhiat theihna,
- thu kician omlo pi in thusit/mat/buluh theihlohna,
- thukhen zum theihpih loh in thu kikhen theihlohna cihte
kinei nonlo suak hi. hite khempeuh galkap mang ten amau thu in a ut ut un vaihawm thei suak hi. tua hi a thuman, thudik sangin ngongtat lauhuaina lam tawh kinaih zaw hi.
Tua hi a, Martial law tangkona hangin mipi te theihpih telcing palaite, thunei makaite thuneihna om nonlo in galkap ten avek in lencip ta cihna ahi hi.
Ei aading in bang kilam dang tuam?
Feb 1, 2021 ni akipan in mipi thuneihna, mipi atamzaw lungkimna tawh telcing palaite, innpite nuaisiah in ukna buluhna hangin Kawlgam, Zogam ah Martial law a tung mahtawh akibang ahi hi.
(a) Covid nasiatak in suksia in, dik ding huih, dawn ding zatui kisam mah taleh khuamial khit kivak khia theilo ahih na hangin nuntakna mualliam san Zogam ah mi 20 val bang ki om hi.
(b) Suakta takin sungtum pusuah theihloh hangin tedim khuatual mahmah ah ii khangno dawnglai mi 8bang thu omlo pi in kaplup thuak uh hi.
(c) Suakta tak in pulak theihna omlohna hangin Tedim leh Tonzang gamhuam ah cdm kumpi nasemte, khangno, pawlpi siate akipan matleh hen tuak hi.
(d) Thukhenna, thubawlna te ah mipi thuneihna omloh na hangin mawhneilo pi mawhnei in kibawl sak hi. diklo napi a dik bangin mipi lak ah migilo honkhat kikhah hichiat lel hi.
(e) A thukician omlo pi in, hunlo phatlo pi in inn sung tawng d**g kilut in hong kisit ziauziau lua hi. hi dan vai bekbek pen Tedim khuapi sungah 10 vei bang omkhin hi.
Hi bangdan thupiangte ii et ciangin Kawlgam, Zogam adiak in Tedim leh tonzang gam aadingin Martial law pen tuphing a akitangko hangin, Martial law bangin hong ki ukcip zawh kum2 bang apai khinta ahi hi.
Tua hi a, mipi te pilvang in eite khat le khat khut kilen a ii dinkhop semsem kei leh ii veeng, ii khuapih, ii mipih te tuahsiatna te pen ii kongbiang d**g ah hong tungthei ziua ahi hi. kua mah kipeng theilo ahi hi.
Mipi tung ngongtatna te suk khin mahmah ta a, tua ngongtatna gitlohna te ii pan theih bangin pang in ii dal ii nan loh a phamawh ta ahi hi.
Tua hang mah in zong Mipi te hamphatna, nopsakna te a kisuaksiat loh nading, akisusia te in amau ngah ding kilawm hehnepna te ngah in, a palsatte in amau mawhna om bangin mawh athuak theih nading ma pangin ki thuza ciat ni cih kong kun nuam uh hi.
Mipi te deihna lunggulhna te lehngat san in, mipi te thaumuk tawh ngongtat takin ukcip theih na dingin hanciamna ahi Martiwl Law tangkona tawh kizui in thukimlohna leh deihlohna thu Human Rights Watch Group - Tedim & Tonzang in ii pulak hi.
photo; credit to original source
