02/02/2023
#ဝီစကီနှင့်_သက်တမ်းကုန်ဆုံးရက်
အသစ်ထွက်ရှိထားတဲ့ ဝီစကီအမှတ်တံဆိပ်အသစ်များကိုဖြစ်စေ၊ နှစ်ခြိုက်စွာသောက်သုံးလေ့ရှိတဲ့ ဝီစကီအမှတ်တံဆိပ်ကိုဖြစ်စေ ယမကာသောက်သုံးသူအများစုဟာ မိမိအိမ်တွင် ဝီစကီပုလင်းများကို စုဆောင်းထားနိုင်ပါတယ်။ သို့သော်လည်း ပုံမှန်သောက်သုံးသူ အများစုအတွက်မူ တစ်ကြိမ်လျှင် ပုလင်းတစ်လုံးသာဖွင့်ပြီး ကုန်အောင်သောက်ခြင်းသည် စည်းကမ်းသတ်မှတ်ထားသည်ဆိုခြင်းထက် နောက်ကွယ်တွင် အကြောင်းချင်းရာများစွာ ကျန်ရှိနေပါတယ်။
ပုလင်းအဖုံးအဖွင့်ရသေးသော ဝီစကီသည် အရည်အသွေးညံ့ဖျင်းသွားမည် သို့မဟုတ် သက်တမ်းကုန်ဆုံးသွားမည် မဟုတ်သည့်အပြင် စနစ်တကျမှန်ကန်စွာ သိမ်းဆည်းထားမည်ဆိုပါက ယေဘူယျအားဖြင့် ရာစုနှစ်ပေါင်းများစွာအထိ တာရှည်အထားခံပါသည်။ သို့သော်လည်း ပုလင်းများကို အဖုံးဖွင့်လိုက်ပါက ပါတ်ဝန်းကျင်ဆိုင်ရာ အခြေအနေများပါ သက်ရောက်လာသောကြောင့် အချိန်ကြာကြာသောက်ရန်စိတ်ကူးထားလျှင် ပုလင်းများစွာကို တပြိုက်နက်တည်း အဖုံးမဖွင့်ထားရန်သာ အကောင်းဆုံးဖြစ်ပါတယ်။
#ဝီစကီပုလင်း_အဖုံးဖွင့်ပြီးရင်_ဘယ်လောက်ကြာကြာထားလို့ရနိုင်မလဲ
ယေဘူယျအားဖြင့် ဝီစကီထဲတွင် ပါဝင်သော Ethyl Alcohol (Ethanol) သည် ပြီးပြည့်စုံသော တာရှည်ခံပစ္စည်းအဖြစ် လုပ်ဆောင်ပေးသောကြောင့် ပုလင်းအဖုံးကို မဖွင့်ဘဲ အကြာကြီးသိမ်းထားလျှင်တောင်မှ အဆိုပါဝီစကီသည် အနံ့၊အရသာများ ဆိုးရွားစွာ ပျက်စီးသွားဖွယ်မရှိပါ။ ဒါ့အပြင် Alcohol ဒြပ်ပေါင်းက ဘက်တီးရီးယားများကိုသေစေနိုင်တဲ့ အစွမ်းရှိတယ်ဆိုတာကို ကျွန်တော်တို့ အားလုံးသိရှိကြပြီးလဲဖြစ်ပါတယ်။ ဒါ့ကြောင့် ဝီစကီပုလင်းအတွင်း အန္တရာယ်ရှိသော မည်သည့်ဘက်တီးရီးယားများ ပေါက်ဖွားနိုင်မည်မဟုတ်သည့် အကြောင်းပြချက်တစ်ခုထဲနှင့်ပင် အခြားသော စားသောက်ကုန်အားလုံးနီးပါးတွင် ကြုံတွေ့နေရသည့် အကြီးမားဆုံးသော အန္တရာယ်ကြီးမှ ဖယ်ရှားပေးပြီးဖြစ်ပါတယ်။
ပုလင်းအဖုံးကို ဖွင့်ထားပြီးရင်တော့ အရက်ပုလင်းများကို ပါတ်ဝန်းကျင်အခြေအနေများက ဝီစကီများကိုဖျက်ဆီးနိုင်သောကြောင့် အောက်ပါအချက်များကို ထည့်သွင်းစဉ်းစားရန် လိုအပ်လာပါပြီ။ ဝီစကီပုလင်းတွေကို ခွက်ထဲငှဲ့ထည့်ရာမှာ အဖုံးဖွင့် တိုက်ရိုက်ငှဲ့ထည့်တာမျိုး မဟုတ်ဘဲ Pourer Stopper သုံးပြီး ငှဲ့တာမျိုးဆိုရင်တော့ Pourer Stopper တပ်လျက်ကြီး မထားသင့်ပါဘူး။ ဝီစကီထဲပျော်ဝင်နေတဲ့ အနံ့နှင့် အရသာကွန်ပေါင်းများဟာ Stopper မှာပါဝင်တဲ့ ပိုက်လိုင်းသေးသေးလေးကတဆင့် တိုးထွက်ကာ အငွေ့ပျံ ပျောက်ကွယ်သွားစေပါတယ်။
အိမ်မှာ အရက်တစ်ပုလင်းကို ဖော့ဆို့ သို့မဟုတ် အဖုံးမပိတ်ဘဲ ဖွင့်ထားကြည့်လိုက်ပါ။ အရက်ဟာ ပုလင်းထဲမှာ ညစ်ညမ်းမှုတွေမရှင်သန်နိုင်တာတောင်မှ အရက်မှာပါဝင်နေတဲ့ အယ်လ်ကိုဟော ရာခိုင်နှုန်းများဟာ တဖြည်းဖြည်းနဲ့ အငွေ့ပျံပျောက်ကွယ်သွားပြီး သောက်သုံးရန်မသင့်တဲ့ အခြေအနေတစ်ခုအဖြစ်ကို ရောက်ရှိသွားမှာပါ။ နိုင်ငံခြားမှ လေ့လာစမ်းသပ်ထားသူများရဲ့အဆိုအရ ပုလင်းကိုဖွင့်သောက်ပြီး အဆိုပါအဖုံးဖြင့်ပင် ပြန်ပိတ်ထားပါက အလွန်ဆုံး ၁နှစ်သာထားသင့်တယ်လို့ ဆိုကြပါတယ်။
#သိမ်းဆည်းရမည့်အပူချိန်
ဝီစကီများကို အဖုံးဖွင့်သောက်ပြီးနောက် စနစ်တကျ ပြန်မပိတ်ထားပါက ထည့်သွင်းထားသောဝီစကီသည် ပါတ်ဝန်းကျင်မှ သက်ရောက်သော အပူချိန်အတိုင်း ပူလျှင် ကျယ်လာပြီး အေးလျှင် ပြန်ကျုံ့ကာ အငွေ့ပျံခြင်းဖြစ်စဉ်ကို ဖြစ်ပေါ်စေကာ ဝီစကီလျော့နည်းခြင်းဖြစ်စေပါတယ်။ ဒီ့အတွက် အကောင်းဆုံးအကြံပေးချက်ကတော့ မှောင်သောနေရာတွင် ထားရှိခြင်း သို့မဟုတ် နေရောင်ခြည်တိုက်ရိုက်ကျရောက်သောနေရာများကို ရှောင်ရှားခြင်း သို့မဟုတ် အပူထုတ်လွှတ်ရာ အပူပေးစက်များနှင့် ဝေးရာတွင် ထားရှိခြင်းတို့ ဖြစ်ပါတယ်။
Malt ဝီစကီများ၏ အဖုံးများသည် Cork ဟုခေါ်သည့် အပူချိန်ပြောင်းလဲမှုဒဏ်ကိုခံနိုင်ရည်ရှိသည့် ဖော့ဆို့များဖြင့် ပိတ်ဆို့ထားလေ့ရှိပါတယ်။ ဖော့ဆို့နှင့် ပုလင်းကြားရှိ သေးငယ် အဟ,ကလေးသည်ပင်လျှင် အငွေ့ပျံခြင်းကို ဖြစ်ပေါ်စေပြီး ဝီစကီ၏အရည်အသွေးကို လျော့ကျစေနိုင်ပါတယ်။ ပုလင်းထဲတွင် အောက်ဆီဂျင်များလေလေ အထူးသဖြင့် အရက်ပြင်းအား ABV % များလေ အချိန်ကြာမြင့်လာသည်နှင့်အမျှ အရက်၏အရည်အသွေးကို ထိခိုက်လာလေလေ ဖြစ်ပေသည်။ ဝီစကီသိုလှောင်ရန် အကောင်းဆုံးအပူချိန်မှာ 15°C မှ 20°C ဖြစ်ပြီး တစ်နှစ်ပတ်လုံး တသမတ်တည်း အပူချိန်ရရှိရန် ထိန်းသိမ်းဖို့ ခက်ခဲလှပါတယ်။
#အလင်းနှင့်_ထိတွေ့ခြင်း
ခရမ်းလွန်ရောင်ခြည်သည် အချိန်နှင့်အမျှ အရက်ထဲတွင် ပျော်ဝင်နေသည့် အရသာမှတ်စုများကို ပြောင်းလဲစေသည့် ကာဗွန်ပါဝင်သည့် ဒြပ်ပေါင်းများကို ဖြိုခွဲနိုင်စွမ်းရှိပါတယ်။ ဝီစကီဖန်တီးသူ ရည်ရွယ်ထားသည့် အရသာများကို ခံစားနိုင်ရန်ဖြစ်သောကြောင့် အလင်းရောင်အောက်တွင် မထားမိစေရန် အစဉ်အမြဲရှောင်ရှားရန် သတိပြုသင့်ပေသည်။ စိတ်ဝင်စားစရာမှာ အစိမ်းရောင်ဖန်ပုလင်းသည် ကြည်လင်တောက်ပသည့် ဖန်ပုလင်းထက် အလင်းထိုးဖောက်မှုကို ပိုမိုခံနိုင်ရည်ရှိသည် ဆိုသည့်အချက်ဖြစ်သည်။ ဒါ့အပြင် အလင်းသည် ဝီစကီ၏ အရောင်ခြယ်ပစ္စည်းများနှင့် အရောင်များကိုလည်း ပျက်စီးစေနိုင်ပါတယ်။
#အဖုံးမဖွင့်ရသေးသော_ဝီစကီသည်_မည်မျှကြာကြာ_ထားသိုနိုင်မည်နည်း
အဖုံးမဖွင့်ရသေးသော ဝီစကီသည် တိကျသော အပူချိန်အတွင်း မှန်ကန်စွာ သိမ်းဆည်းထားပြီး ခရမ်းလွန်ရောင်ခြည်အပါအဝင် အခြားအလင်းရင်းမြစ်များနှင့် မထိတွေ့ထားပါက ကာလကြာရှည်စွာ သိမ်းဆည်းထားနိုင်ပါတယ်။ ကမ္ဘာ့သက်တမ်းအရင့်ဆုံး ဝီစကီအချို့သည် လေလံတင်ရောင်းချပွဲများတွင် စံချိန်တင်ဈေးနှုန်းများရရှိသော်လည်း အဆိုပါဝီစကီများ၏ သက်တမ်းမှာ ဖန်ပုလင်းအတွင်းသို့ ထည့်သွင်းပြီးသည်နှင့် တပြိုက်နက် အဆိုပါဝီစကီ၏ သက်တမ်းမှာ ထပ်မံတိုးလာခြင်းမရှိတော့ပါ။ ဥပမာအားဖြင့် သက်တမ်းနှစ်၂၀ရှိသည့် အရက်ပုလင်းဟာ နောက်အနှစ်၁၀၀ကြာရင်လဲ သက်တမ်းနှစ်၂၀ရှိတဲ့ အရက်ပဲ အမြဲဖြစ်နေမှာပါ။ အနှစ် ၁၂၀ ဖြစ်မလာပါဘူး။ သစ်သားစည်အတွင်းမှာရှိတဲ့ Angel's Share လုပ်ငန်းစဉ်လုပ်ဆောင်ထားတဲ့ နှစ်ကိုသာလျှင် သက်တမ်းနှစ်အဖြစ် သတ်မှတ်ထားကြပါတယ်။
#ဝီစကီပုလင်းများကို_သိမ်းဆည်းရမည့်_ပုလင်းအနေအထား
အထူးသဖြင့် Cork @ ဖော့ဆို့ အဖုံးပါတဲ့ Malt ဝီစကီပုလင်းများကို ဝိုင်ပုလင်းများကဲ့သို့ ပုလင်းများကို လှဲပြီး မသိမ်းဆည်းသင့်ပါဘူး။ ပုံမှန်အတိုင်းပဲ ပုလင်းကိုထောင်ပြီးပဲ သိမ်းဆည်းသင့်ပါတယ်။ သို့သော်လည်းပဲ ၆ပါတ် နဲ့ ၈ပါတ်ကြားတခါ ပုလင်းကို ခေတ္တခဏ ဖော့ဆို့ကို အရက်စိုစွတ်သွားအောင် လှန်ပေးသင့်ပါတယ်။ ဒါ့အပြင် ဖော့ဆို့များလုံသေးကြောင်း သေချာစေရန် အသာအယာလှည့်ကြည့်ပေးရန် လိုအပ်ပါတယ်။ အဘယ်ကြောင့်ဆိုသော် ဝီစကီတွင် အယ်လ်ကိုဟော ပါဝင်မှုများပြီး ဖော့ဆို့များကို စားပြီး ကွဲအက်စေခြင်းနှင့် အချိန်ကြာလာသည်နှင့်အမျှ ခြောက်သွေ့လာပြီး ကျုံ့ဝင်ခြင်းတို့ကြောင့်ဖြစ်သည်။
ယမကာသုတေသီ တင်အောင်လွင်
https://www.facebook.com/102041882221576/posts/149124230846674/
