19/03/2023
ابني عايز يشرب لأنه مش شايف إن فيه حكمة من العطش ...!!!
_لو بنصوم علشان نحس بالفقراء ، فكفاية إننا ما ناكلش ، ليه ما نشربش ؟
_وبعدين الفقراء كمان بيصوموا ، طب بيصوموا عشان يحسوا بمين ؟؟
_الحقيقة الولد عنده حق ..
_فكرة إن الصيام هدفه إننا نحس بالفقراء فكرة غلط ١٠٠٪
ما فيش آية في القرآن بتقول إننا بنصوم عشان نحس بالفقراء
_الفكرة دي بتطلع ملايين فاهمين إن الصيام مجرد تكدير وعكننة ..
شوية جوع وعطش وصداع و إننا كان ممكن نحس بالفقراء بطريقة تانية غير كدا ..
ودي كارثة لأننا بنخسر الهدف الوحيد من الصيام ..
_ولما الهدف يضيع منك هتتعب أكتر لإنك مش فاهم حكمته ..
_علم ولادك إن الصيام مفروض علينا عشان نتعلم نتحكم في شهواتنا ..✔️
_علم ولادك إن الصيام مفروض عشان ندرب نفسنا علي الصعب ...✔️
_علم ولادك إن الصيام بيمنعنا من شهوات حلال عشان بعد كدا يبقى ترك الغلط والمعاصي والحرام يبقي سهل ..✔️
_علم ولادك إن الصيام ال بيمنعك من الحلال وانت بتقوله سمعًا وطاعة هو دا قمة الخضوع والاستسلام لله ..✔️
_علم ولادك إن التسليم المطلق لله من غير ليه وازاي هو ده اللي احنا اتخلقنا علشانه ...✔️
_علمه من دلوقتي علشان الموضوع حيبقى أصعب بكتير لو كبر من غير ما يتعلم .👌
يقول النبي -صلى الله عليه وسلم-: “الصوم جُنَّة، فإذا كان يوم صوم أحدكم فلا يرفث ولا يصخب، فإن سابَّه أحد أو قاتله فليقل: إني صائم إني صائم” رواه البخاري ومسلم.
